Vegleiðing til foreldur og børn
Tað er okkum ein gleði at bjóða tær á legu. Vit hava gjørt okkara besta og vóna, at tað verður ein signingarrík og ógloymandi lega, vit fara at hava saman.
Hvat tú skalt hava við?
• Bíbliu, blýant og skrivibók.
• Klæði, ið eru sámulig og hóskandi til leguna.
• Regnklæði, styvlar og spæliskógvar.
• Innanduraskógvar at nýta í nýggju spælihøllini.
• Dýnuvár, koddavár og lak.
• Svimjiklæði. Svimjiring um neyðugt. Ikki baðihandklæði, tí reint fæst hvønn dag.
• Tannbust, sjampo v.m.
• Navn á øllum klæðum og skóm.
Avboð
Av tí at tað ofta er bíðlisti til legurnar, heita vit á teg um beinanvegin at siga okkum frá, um tú ikki kanst koma.
Ferðing
Tíðir fyri fráferð, heimferð og ábyrgdarfólk sæst við fyrst at velja "Legur" og síðani "Ferðing" í valmyndini ovast á síðuni.
• Merk viðførið við tíni egnu adressu og adressuni hjá Zarepta.
Peningur
Kostnaðurin fyri leguna og GS-lykil stendur í brævinum um at tú er sloppin á legu. Kostnaðurin kann eisini síggjas við fyrst at velja "Legur" og síðani "Prísir" í valmyndini ovast á síðuni.
Legugjaldið skal flytast fyri hvørt barnið sær. GS-lykilin skal nýtast til at gjalda við.
Tey, ið mugu gjalda ein part av ferðini, fáa peningin afturgoldnan í Zarepta við at vísa kvittan.
Tey, ið ferðast aðrar tíðir, enn Zarepta skipar fyri, gjalda sjálv ferðina.
Lummapeningur er ikki íroknaður legugjaldið. Á legu 4-8 er lummapeningurin kr. 30,00 um dagin.
Allur peningurin verður latin liðleiðaranum við legubyrjan.
Systkinaavsláttur
Fyrsta barnið skal gjalda fult, annað og triðja fáa kr. 75,- í avsláttri. Fjórða, fimta o.s.fr. gjalda einki legugjald.
"HINI"
Eins og undanfarin ár verður skipað fyri innsavning til "HINI" (Hini merkir øll onnur børn í heiminum).
Aftur í ár fer innsavnaði peningurin til barnalegur í Ukraina.
Telefon
Vit heita á foreldrini um ikki at ringja til børnini, uttan tað er neyðugt. Ynskir barnið at ringja heim, kann tað venda sær til liðleiðaran. Hevur leguluttakarin telefon við, verður hon við legubyrjan latin liðleiðaranum í varðveitslu.
Sjúka og aðrir trupulleikar
Skal barn hava heilivág á leguni, skulu foreldrini geva leiðsluni skrivliga frágreiðing.
Sendið ikki børn á legu, sum hava smittandi sjúku ella verða viðgjørd fyri eitthvørt smittandi.
Foreldur at børnum, ið kunnu gera seg vát um náttina ella ganga í svøvni, verða biðin um at siga okkum frá hesum skrivliga ella við at ringja. - Vit hjálpa børnunum og taka neyðug stig til, at onnur ikki varnast trupulleikan.
Endamál
Høvuðsendamálið við barna- og ungdómslegunum er at vinna børn og ung fyri Kristus og at læra tey Orð Guds.
Vit ynskja at geva børnum og ungum eina góða uppliving saman í tryggum umhvørvi við spæli og fjølbroyttum ítrivi.
Eisini ynskja vit, at tey mennast innan karmarnar fyri góðari samveru millum menniskju: At vera ásettum reglum lýðin, at bera seg siðiliga at og at virða hvør annan.
Dentur verður eisini lagdur á at sýna náttúru- og mentanarvirðum ans.
Viðtøkur fyri Zarepta
Tað er ikki loyvt:
• at roykja á leguni.
• at hava bøkur, bløð, spøl og annað, ið ikki fremur endamálinum við leguni.
Áheitan
Kæru foreldur, hjálpi okkum! Greiðið sjálv børnunum frá innihaldinum í brævinum. Tað lættir um hjá liðleiðaranum.
At enda takka vit øllum, sum hava litið okkum børn síni upp í hendur. Vit vilja gera okkara besta at røkja hetta starv til Guds æru og børnunum til signingar.
ZAREPTA
